أكتوبر 22, 2020

رئيس مجلس الإدارة أ/ على عزالدين

مدير التحرير ا زكريا سرور

عودة الي الماضي وقيمه

كلمات الشاعر :أحمد النوبى

(من اضاع ماضيه لا حاضر له ولا مستقبل) .
من ساعة ما الكاكاو بقي هوت شوكلت …
و البليله بقت بينز …
و الفيشار بقي پوپ كورن …
و الملوخية بقت جرين سووپ …
كله كوم و ‘جرين سووپ’ دى كوم لوحدها طبعا …
و القهاوي بقت كافيه …
و القهوه نفسها بقت كوفي … ايشي تركش و اميريكن و كمان الحليب بقي ميلك …
و من ساعة ما الكلسون بقي ليجن …
واللباس بقي بوكسر
و البقسماط بقي باتون ساليه …
و الفطير بقي اسمه كريب …
من ساعة ما العري بقي أوبن مايندد -أي (عقل متفتح).
و الهدوم المقطعه بقت ستايل …
و المخدرات بقت روشنه و صياعه …
و كمان بقي عندنا سنجل مزر وسنجل فازر برضو علشان محدش يزعل و يبقى فيه مساواة …
من ساعة ما الراجل بقي مُز … و البنت بقت رجوله …
من ساعة ما الوطنيه بقت في خبر كان …
والتدين السليم بقي تخلف …
و العادات الشرقيه بقت بيئه …
و ‘السلام عليكم’ بقت بلدي …
من ساعة ما الخلافات بقت اون لاين – .
و الزعل بقي بلوك …
و الضحك بقي ايموشن – اي (مشاعر)
و كمان بقينا نكتب عربي بحروف انجليزي من باب الروشنه … والجهل .
ومن ساعة ما البني آدم بقى قيمته ف لبسه و نوع موبيله مش ف أخلاقه و احترامه …
من ساعه ما بقينا نحس بالوحده في وسط اهالينا …
ولما القرايب قالو عنهم عقارب …
والصحاب بقوا عرر …
هو احنا اتغيرنا اوي كده ليه ؟ والناس مبقتش زى زمان ؟ و بنسال نفسنا الدنيا ليه اتغيرت ؟
الناس اتغيرت … و نسينا كل عاداتنا و أصالتنا و جذورنا … قطعنا أرحامنا وفقدنا إحساسنا بالمحتاج (مش شرط محتاج فلوس .. حتي اللي محتاج عطف و حنان ومجرد احساس صادق.. مجرد احساس بالوجود ) و أصبحنا بلا هويه … بلا أخلاق .. بلا إنتماء ولا أحساس . وضاعت النخوة والهيبة وبقينا خيبة .
عودوا الي جذوركم …